الثلاثاء، مارس 02، 2010

الغراب

السلام عليكم ورحمة الله وبركاته
بسم الله الرحمن الرحيم

وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَاناً فَتُقُبِّلَ مِن أَحَدِهِمَا وَلَمْ يُتَقَبَّلْ مِنَ الآخَرِ قَالَ لَأَقْتُلَنَّكَ قَالَ إِنَّمَا يَتَقَبَّلُ اللّهُ مِنَ الْمُتَّقِينَ{27} لَئِن بَسَطتَ إِلَيَّ يَدَكَ لِتَقْتُلَنِي مَا أَنَاْ بِبَاسِطٍ يَدِيَ إِلَيْكَ لَأَقْتُلَكَ إِنِّي أَخَافُ اللّهَ رَبَّ الْعَالَمِينَ{28} إِنِّي أُرِيدُ أَن تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ وَذَلِكَ جَزَاء الظَّالِمِينَ{29} فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ{30} فَبَعَثَ اللّهُ غُرَاباً يَبْحَثُ فِي الأَرْضِ لِيُرِيَهُ كَيْفَ يُوَارِي سَوْءةَ أَخِيهِ قَالَ يَا وَيْلَتَا أَعَجَزْتُ أَنْ أَكُونَ مِثْلَ هَـذَا الْغُرَابِ فَأُوَارِيَ سَوْءةَ أَخِي فَأَصْبَحَ مِنَ النَّادِمِينَ{31}
صدق الله العظيم

دور الغراب في هذه القصة هو تعليم الانسان كيف يدفن موتاه فلماذا أختاره الله سبحانه وتعالى من دون المخلوقات ليكون المعلم الأول للأنسان
أثبتت الدراسات العلمية أن الغراب هو أذكى الطيور وأمكرها على الاطلاق ,ويعلل ذلك بأن الغراب يملك أكبر حجم لفصي دماغ بالنسبة الى حجم الجسم في كل الطيورالمعروفة.
ومن بين المعلومات التي أثبتتها دراسات سلوك عالم الحيوان محاكم الغربان وفيها تحاكم الجماعة أي فرد يخرج على نظامها حسب قوانين العدالة الفطرية التي وضعها الله سبحانه وتعالى لها ولكل جريمة عند جماعة الغربان عقوبتها الخاصة بها

جريمة اغتصاب طعام الفراخ الصغار: العقوبة تقضي بأن تقوم جماعة من الغربان بنتف ريش الغراب المعتدي حتى يصبح عاجز عن الطيران كالفراخ الصغيرة قبل اكتمال نموها
جريمة اغتصاب العش أو هدمه:تكتفي محكمة الغربان بإلزام المعتدي ببناء عش جديد لصاحب العش المعتدى علي
جريمة الاعتداء على أنثى غراب أخر:تقضي جماعة الغربان بقتل المعتدي ضربا بمناقيرها حتى الموت. وتنعقد المحكمة عادة في حقل من الحقول الزراعية أو في أرض واسعة,تتجمع فيه هيئة المحكمة في الوقت المحدد,ويجلب الغراب المتهم تحت حراسة مشددة, وتبدأ محاكمته فينكس رأسه, ويخفض جناحيه, ويمسك عن النعيق اعترافاً بذنبه , فإذا صدر الحكم بالإعدام ,وثبت جماعة من الغربان على المذنب توسعه تمزيقا بمناقيرها الحادة حتى يموت, وحينئذ يحمله أحد الغربان بمنقاره ليحفر له قبرا يتواءم مع حجم جسده, ويضعه فيه ثم يهيل عليه التراب حرمة للموت.


وهكذا تقيم الغربان العدل الإلهي في الأرض أفضل مما يقيمه كثير من بني أدم.



فسبحان الله













المصدر {من أيات ألاعجاز العلمي الحيونات في القرأن الكريم}الدكتور زغلول النجار


.............................................................................................

على الهامش كدة بقى



مجرد تساؤلات



 
نفسى افهم مين صاحب العزبة اللى احنا عايشين فيها دى ، ونفسى اعرف احنا لحد امتى هنبقى خايفيين وموطيين



البلد بتتسرق من كل من هب ودب واى واحد يفتح بقة ويتكلم بيلاقى امن الدولة فوق راسة يعنى من الاخر كدة اسرقك قدام عينك واياك تفتح بقك او تعترض .



حد فى الدنيا يصدق ان بطرس غالى اللى عنده قصر فى الزمالك يصل ثمنه الى اكثر من تسعين مليون جنيه ، غير اكلاكه الاخرى التى تقدر بمئات الملايين ، والارصدة الخارجية المتلته اللى محدش عارف جات منين وبتروح فين ، يبقى بعد ده كله يحتاج يتصرف له مليون جنيه عشان يتعالج على نفقة الدولة ؟؟؟؟؟؟؟؟؟؟؟



دانا لما كنت باعمل قررات العلاج على نفقة الدولة لاهل دايرتى كنت مش باعرف اجيب اكتر من الفين جنيه بالعافيه لمريض يحتاج الى ثمانية الاف جنية للعلاج ، او 400 جنية بطلوع الروح عشان مريض محتاج الفين جنيه .



وموضوع العلاج على نفقة الدولة ده بالذات من اكتر من عشر سنين محدش عارف فلوسة وميزانيته بتروح فين بالتحديد والفساد فيه وصل للركب ، ويكفى ان المرضى لا يجدون ما يحتاجونه من ادوية فيضطرون الى صرف العلاج البديل والذى يكون ارخص بكثير ولا يكون بنفس كفاءة وفاعلية الدواء الاساسى ، ناهيك من البهدلة وطلوع العين اللى المرضى بتشوفها والمعاملة السيئة جدا من الموظفين واطباء اللجان الثلاثية .



..........................................................................................



واه يانى من مرارتى اللى هتتفقع دى ، بقى احمد نظيف يروح يعيشله يومين مع عروسته الجديدة يقوم يصرف فى اسبوع واحد 28 الف جنيه مشروبات فقط لاغير ، ليه كان بيشرب ايه ، مية دهب وللا تكون عصائر مستوردة من المريخ .



طب لما دى ميزانية المشروبات امال التنقلات تبقى ميزانيتها ايه ، والاقامة نفسها وميزانية المأكولات والاتصالات وخلافة .



...........................................................................................



وبعدين حد يفهمنى قبل ما اتجنن ، مشروع توشكى اللى قعدوا يغنوا بيه على قفانا اتناشر سنه ، ايه اللى عاد على المصريين منه فين فرص العمل الواعدة اللى وعدوا بيها وفين الاكتفاء الذاتى من القمح وفين الفلوس اللى عليكوا ... عفوا اقصد وفين المليارات اللى اتصرفت على المشروع ، وبعدين بقى مشروع شرق التفريعة ده راح لحد فين



ومشروعات تنمية سيناء متوقفة بقالها اكتر من خمسة وعشرين سنة ليه ، وسايبين اليهود يطلعوا منها احلى حسنة ، شاطرين بس تعملوا فيها شواطىء للعراه وقرى للزناه وتسموها بغير اسمائها / قرى سياحية/ وتسموا ده مشروعات عملاقة وتنموية . لاء ونعم التنموية.



...............................................................................



وزير الداخلية صفته ايه عشان يصدر قرار يتيح للمراءة السفر بدون اذن الزوج ، القرار ده غير دستورى ، وممكن اى زوج بمنتهى اليسر والسهولة يطعن على قرار الوزير فى الادارية العليا بعدم الدستورية ويتلغى القرار بسهولة ، وده لانه مخالف للمادة التانية من الدستور المصرى التى تنص على ان الشريعة الاسلامية هى المصدر الاول للتشريعات والقوانين فى مصر ،وقرار الوزير مخالف للشريعة الاسلامية مخالفة صريحة لا تقبل الشك او القدح لا من بعيد ولا من قريب ، فاهم يا بعيد



..................................................................................



يا عالم يا نااااااااااس ليه لحد دلوقتى الدولة عاملة ودن من طين والتانية من عجين بالنسبة لقانون الايجارات القديم والذى يمنح حقا لغير صاحبه ويسلب حقا من صاحبه بالباطل .



هل يعقل انى انا مثلا اقوم أأجر شقة عند حضرتك باى مبلغ / ما علينا من القيمة الايجارية/ تقوم سيادتك تفاجأ بان من حقى انى اورث الشقة بموجب عقد الايجار القديم لاحد ابنائى ثم يقوم هو بدورة بتوريثها الى احد ابناءه او زوجته وهى ملكك انت ، يعنى انا اورث ملك الغير للغير ، يسلااااااااااام دى حاجة حلوة خالص .



طب القانون ده حصل فى زمن جمال عبد الناصر ليه يستمر لحد دلوقتى ليه ما يتعدلش لصالح صاحب الحق ومالك العين المؤجرة



من الزمن ده للزمن ده ياقلبى لاتحزن



بقى ياربى نخرج من نقرة عشان نوقع فى دحديرة .



...................................................................................



وقال على رأى الشاعر



بيع يامعلم واشترى فينا ، وكأنها عزبة والديك.... ماحنا عشان مالخوف وطينا ، اركبنا ودلدل رجليك



.....................................................................................



بقول ايه.. كفاية لحد كدة ونبقى نكمل بعدين

اذا كان هيبقى فيها بعدين

................

دمتم سالمين

هناك 7 تعليقات:

  1. أحييك على ذكر مثال الغراب رغم قراءاتى السابقة لها

    اما تعليقى على الهامش فهو
    اللهم ارفع غضبك ومقتك عنا

    ردحذف
  2. شكرا علي معلوماتك عن الغراب والتساؤلات الاجابه عنها فى تعليق أخر أن شاء الله

    ردحذف
  3. معلومات جميله أووى
    متشكره على المجهود الرائع

    وربنا يصبرنا على مااللى بنشوفه
    نفس اللى بحصل عندنا
    اخى الفاضل
    دمت ودام قلمك
    ايناس

    ردحذف
  4. المهاجر إلى الله : طارق

    أحييك على موضوع الغربان هذا حقيقي موضوع يدل على عدالة إلهية في كل المخلوقات ....وطالما فيه عدالة إليهية و البشر غير أسوياء بعيدين عن الدين فلماذا لا يكون هذا حالنا؟؟؟؟ تحياتي

    ردحذف
  5. السلام عليكم طارق

    انا وانت عارفين مين صاحب العزبه
    هو الناظر وهو الخولى وهو صاحب العزبه وهو كل حاجه
    واحنا يا دوب تمليه عند اللى مخلفينه .. ربنا ياخده اخذ عزيز مقتدر
    تحياتى

    ردحذف
  6. السلام عليكم ورحمة الله وبركاتة
    ربنا يكرمك يارب والمسلمين ...
    شاركونا فى حملة "لا للتهويد " علشان نبدأ النشر بداية من السبت 6 /3 بأذن الله تعالى الله يكرمك ساعدونا
    http://rasoulallah1.blogspot.com/2010/03/blog-post.html

    ردحذف
  7. طارق سليم3/05/2010 09:48:00 ص

    السلام عليكم ورحمة الله وبركاته :
    الاخت الفاضلة موناليزا :
    زيادة الخير خيرين ، فعلا والله ربنا يرفع غضبة ومقته عنا وينصرنا دوما ، ما هو اللى احنا فيه بعمايلنا بردوا وببعدنا عن ربنا وعن صحيح الدين .

    ..........................
    اختنا الفاضلة ايناس :
    شكرا لك اختى على ايه بس ، موضوع الغراب ان واخده من الفيسبوك ونسبته لمصدره الاصلى ، يعنى انا معملتش مجهود ، انا بس انبهرت بالمعلومات زيك ، وحبيت انى انشرها عشان يستفيد منها اكبر عدد ممكن ، يمكن يكون له مردود عند شخصا ما ،
    ايه بردوا عندكم فى المنصورة مشاكل فى العلاج الاقتصادى ، على فكرة انا من فترة كنت ناوى اعمل جولة فى مدن الدلتا الكبرى واسجل اللى بيحصل بالظبط صوت وصورة عشان بعد كدة محدش يبقاله حجة ، بس للاسف كل مرة أأجل لسبب شكل ، بس ان شاء الله هعمل الجولة دى قريب قوى وهتشمل / طنطا ، شبين ، منوف، قويسنا ، بركة السبع ، كفر الزيات ، المحلة الكبرى ، المنصورة ، كفر الشيخ ، بيلا ، زفتى ، ميت غمر ، بالاضافة الى دمنهور / دعواتك معانا بقى .

    ............................

    السيدة الفاضلة كلمات من نور :
    شوفتى بقى ، الحيونات اللى احنا مكرمين ومفضلين عليهم ، عارفين معنى العدل والظلم ، وبيقيموا دولة العدل .
    اما فى البشر فيظهر كدة انهم نسيوا خالص القاعدة اللى بتقول العدل اساس الملك . حسبنا الله ونعم الوكيل .

    ........................
    الاستاذ الفاضل فشكوول :
    العزبة دى بتعاتنا احنا يا استاذنا المفروض اننا اصحاب اكلمة الاولى والاخيرة فيها والمفروض انه مجرد موظف كما هو مكتوب فى الورق ، بس اصلهم سالوا قبل كده وقالوا / يا فرعون ايه فرعنك ، قال مالقتش حد يصدنى /
    الخوف واللامبالاه والسلبية اللى بيتميز بيها المصريين عن غيرهم من الشعوب خلاه يعمل كدة ولسه الاسوا لم ياتى بعد .

    ............................
    طهر فؤادك:
    وعليكم السلام ورحمة الله وبركاته .
    شكرا لك اخى على المرور ، ان شاء الله حاضر .

    ردحذف