الاثنين، فبراير 08، 2010

ساعة حساب ...

قصة قصيرة اعجبتنى ماخوذة من كتاب ( ماذا فعل العيان بالميت ) تاليف بلال فضل .
منقولة بتصرف
.........................................


ما اسمك؟
والله ما انا فاكر ، بس المفروض انكو عارفينه يعنى .
ما دينك ؟
مسلم ان شاء الله .
يعنى اية ، انت مسلم وللا ان شاء الله ؟
مسلم بس انا دايما باقدم حاجتين ، الساعة والمشيئة
طب المشيئة وعرفناها ، بتقدم الساعة ليه ؟
مش باحب اسابق الزمن .
شقى ام سعيد ؟
لاء انا مصرى .
يعنى مش فاهمين ؟
يعنى انا سعيد بشقائى وشقى بسعادتى.
هل تذكر كيف توفيت ؟

كنت رايح معهد الاورام اعمل جلسة كيماوية خدتها على نفقة الدولة بعد ما بعت صيغة مراتى ، مكفتش قومت بايع العفش ، ماكفاش ، قومت بايع هدومى ... المهم انها الحمد لله كانت على نفقة الدولة .. قام الميكروباص اللى انا راكبة عمل حادثة على المحور .. بس بيتهيألى انى نجيت منها لان الاسعاف لما رامانى فى المستشفى لقونى سليم ومفياش حاجة وطلبوا منى ستميت جنيه عشان يطلعونى من غير ما يسرقوا كليتى ،لما لقونى بعتها من سنة حلفوا ما يخرجونى الا لما اتبرع بالدم.. قولت لهم مش هاينفع عشان من يومين عضنى كلب امير سعودى ماصدقونيش الا لما عضيت دكتورة التخدير فى .. كعبها ، افتكرتها ممرضة غلبانه مالهاش دية ، طلعت مسنودةوحلفت انى لو ما اتادبتش هتقفل المستشفى ... اتحايلت الدكاترة عليا عشان مااقاومش الاعتقال عشان خاطر المستشفى ماتتقفلش وينقطع اكل عيشهم ، سلمت امرى لله و كنت فاكر ان الحكاية هتخلص بسرعة .. بس فى القسم اتاخرنا عشان الظابط كان بيعذب سواق الميكروباص اللى خلى امين الشرطة يقعد على الكرسى القلاب ... السواق بيحلف ان كل غلطته انه قال لامين الشرطة اقعد رابع ورا، لكن لما طلعله الكارنيه قومله واد كان رايح سفارة رومانيا يقدم على طلب هجرة وقعده جنب ست كبيرة كانت رايحة تزور ابنها اللى فى المعتقل من خمستاشر سنة ولما الناس لمت الاجرة الامين صادرها وقال للسواق انه حاسس ان فيها ربع جنيه مخروم مزور وهيبقى يفحص الفلوس كويس لحد ما يطلعه ... السواق مسكتش قاله دا مايرضيش ربنا ، وعنها بقى ، الكلام ده عرفته فى الطب الشرعى لما روحنا انا والسواق عشان نثبت ان الظابط كهربنا من خلاف .. السواق الغلبان وهوه خارج اتمسك امن دولة لما عمل لحماته عرض عسكرى عشان رفضة تسلمه مراته اللى سيحتله فى الحارة وقدام الناس وقالت انه من ساعة ما رجع من القسم معدش زى الاول ، انا بقى رجعت من  الطب الشرعى مقهور عشان جلسة الكيماوى فاتتنى .. لقيت مراتى عاملة العشا وقعده بترجع جبنة عشان السجق طلع فسدان .. حاولت اسعفها باى طريقة شاورتلى على ابنى صلاح اللى لقيته قاعد عالكنبة بيفرفر اتاريه من ساعة ماراح الوحدة يطعم وهو مش على بعضة .. كان التلفزيون بيذيع خطبة للريس من غيظى حدفته بطبق ولع التلفزيون .. مسكت النار فى الشقة ... انقذت صلاح وسبت مراتى بناءا على الحاحها بس مصيبتى طلعت اهون من غيرى ، لان النار مسكت فى الحارة كلها ولما اتصلنا بالمطافى ردت علينا فتاة ( نهار) وقلتلنا نشترك فى المسابقة ولما حلينا غلط قفلت الخط ولما اتصلنا تانى وحلينا صح الخط قطع .
بااااااااااس .. بس كفاية ، ايه ده ، كل ده واحنا لسة معرفناش انت مت ازااااى ؟
نعم ... ايه ... اه .. ايوة ايوة افتكرت ، انا مت موتة ربنا ياجماعة
طب ماكنت تقول كدة من الصبح يا اخى .. شاطر بس تتعبنا معاك ، كنا ناقصينك يعنى .
ياجماعة بعد كدة اى مصر محدش يسالة مت ازاى ، اسالوه كنت عايش ازاااى .

هناك 4 تعليقات:

  1. ياربي ميت وبرضه مصري بربنط مش بيفصل ...احنا آخرنا كلام وكلام من كلام ..بس حلوة يا مهاجر ....اختيار موفق

    ردحذف
  2. لا حول ولا قوة إلا بالله .. هي دي حياة المصري ..
    اختيار موفق بالفعل

    ردحذف
  3. المهاجر2/09/2010 08:50:00 م

    كلمات من نور : ههههههه فعا هما كدة المصريين دايما ، بيموتوا فى الكلام زى عنيهم ،بس الله يكون فى عونهم راضيين بالهم والهم مش راضى بيهم ، الحمد لله نى اصلا مش مصرى .
    تحياتى ليكى كتير

    ردحذف
  4. المهاجر2/09/2010 08:55:00 م

    اختنا الفاضلة Unique اهلا بيكى اختى فى اول زيارة لك :
    فعلا والله عندك حق لا حول ولا قوة الا بالله ، المصرى المطحون على الدوام ، ربنا معاه بقى ، بس على فكرة المصريين هما اللى ججايبينه لنفسيهم ، عموما الله المستعان .
    تحياتى

    ردحذف